ABS-CBN PRESIDENT AND CEO CHARO SANTOS-CONCIO, IBINUNYAG ANG SIKRETO NG MGA PATOK NA KAPAMILYA PROGRAM

Ano ang sikreto sa likod ng tagumpay ng mga palabas ng ABS-CBN kung kaya’t patuloy na tinatangkilik at minamahal ang mga ito ng publiko?

Ayon sa ABS-CBN president at CEO na si Charo Santos-Concio, pumapatok ang mga programa ng Kapamilya network dahil pinapakita ng mga ito ang mga kahanga-hangang katangian ng mga Pilipino.

“Hindi ito tungkol sa amin, kundi sa magagandang katangian ng ating mga kababayan na nagbibigay ng inspirasyon sa mga manonood,” pahayag ni Santos-Concio sa kanyang keynote speech sa “Fifty Shades of Marketing” conference, na ginanap sa Sofitel Plaza Manila kamakailan.

Aniya, dahil dito kaya tumatak sa mga manonood ang top-rating programs na “Be Careful With My Heart” at “Forevermore” na ipinakita ang tunay na kwento ng mga Pilipino.

Ayon sa kanya, isa sa mga bagay na pinakamahalaga para sa mga Pilipino ay ang integridad ng kanilang pamilya. Dahil dito kaya nagtagal sa ere ang morning show na “Be Careful With My Heart” dahil sa mga eksenang bida ang damayan at pagbubuklod ng pamilya.

“Pamilya ang lahat para sa mga Pinoy. Kaya nilang gumising sa umaga dahil dapat silang kumayod nang husto para sa pamilya. Kaya nilang tanggapin ang lahat ng parusa dahil nariyan ang kanilang pamilya na tutulungan silang gumaling. Mas nagiging mahalaga ang bawat tagumpay at kabiguan kapag kasama ang pamilya,” aniya.

Isa pang teleseryeng sinubaybayan ng publiko ay ang “Forevermore” na pinagbidahan nina Enrique Gil at Liza Soberano. Bukod sa nakakakilig na chemistry ng dalawang bida, napalapit pa rito ang mga manonood dahil sa ganda ng La Presa at ng mga karakter na nakatira rito.

Ani Santos-Concio, ipinakita ng “Forevermore” ang kabutihan ng mga Pilipino sa pamamagitan ng pakikipagkapwa-tao sa komunidad.

Bukod sa feel-good na mga eksena, tinatangkilik din ang Kapamilya programs at mga pelikula ng Star Cinema dahil nakaka-relate ang mga manonood sa mga bida na sinasalamin ang kanilang mga tunay na karanasan.

Halos kalahati na ng mga manonood nationwide ang tumutok sa ABS-CBN noong Hunyo matapos humataw ang Kapamilya network sa average national audience share na 47% kumpara sa 32% ng GMA, base sa datos mula sa Kantar Media.

Mula rin sa ABS-CBN ang mga pinakapinapanood na programa sa bansa ngayon. Ngayong Hulyo, nagtala ang “The Voice Kids,” “Pangako Sa ‘Yo,” “Pasion de Amor,” at “Nathaniel” ng kani-kanilang all-time high ratings.

Bukod sa TV viewership, mainit na pinapanood na rin ng mga Pilipino noong Hunyo ang mga palabas ng ABS-CBN sa kanilang computers, laptops, o smartphone gamit ang video-on-demand at livestreaming service ng iWanTV na nakakuha ng 74.6 milyong page views noong Hunyo. Nangunguna sa pinakapinanood na Kapamilya shows online ang “Pangako Sa’yo” (4.2 million views), “Pasion de Amor” (1.5 million views), “Bridges of Love” (1.5 million views), “Oh My G” (1.2 million views), at “Gandang Gabi Vice” (866,777 views).

Ang Philippine Marketing Association ang nag-organisa ng “Fifty Shades of Marketing” na pinamunuan ng ABS-CBN chief digital officer na si Donald Lim.