"Hindi naman ako nagmamadali Ma eh, muntik lang!" Sarah Geronimo to her Mommy Divine

Kung paanong super kilig ang episode nito last week, kagabi naman ay halos bumaha ang luha dahil sa eksenang napanood ng lahat sa Sarah G Live. In a rare moment ay umupo sa isang interview kasama ni Sarah Geronimo ang mga magulang niyang sina Daddy Delfin at Mommy Divine - na buong linggong napunta sa sentro ng kontrobersiya, dahil diumano ay pinatigil niya na sa panliligaw si Gerald Anderson sa kanyang anak. Pero ang isa pang bersyon ng kwento, mismong si Gerald na raw ang sumuko sa panliligaw sa Popstar Princess - na sa guesting niya sa Kris TV ay sinabi niyang isang amazing journey.

Ang special guest ng show na si Ai Ai delas Alas ang tumayong host sa interview portion nina Sarah and her parents. May isang grupo ng fans na nagtanong kung sinong nagpapatibok sa puso ni Sarah ngayon... at matapos ang mahabang silence, sinabi ni Sarah na "siguro po kailangan ng, kung sino man siya, kailangan siguro ng panahon para mapatunayan ko sa sarili ko kung totoo ba yung tinitibok ng puso ko, o kung totoo din ang tinitibok ng puso niya. So sabi nga time will tell, at ang Diyos, ako hindi yung gusto ko kundi yung gusto ng Diyos para sa akin."

"Kasi pagka gusto ni Lord, 100% yan," pagsegunda ni Mommy Divine.

"Talagang walang doubts and fears," dugtong ni Sarah. 

Biglang sinundot ng tanong ni Ai Ai kung sa tingin ba raw ni Mommy Divine sino ang gusto ni Lord... "Mahirap magsalita, pero magpaparamdam syempre yun lalo, lalo na sa akin. Nanay ako eh," sagot ni Mommy Divine.

Hirit pa ni Ai Ai, "so ngayon medyo alam mo na kung sinong gusto ni Lord?"

"Hindi pa, wala pa. Alam ni Sarah yun," ang diretsong pahayag ni Mommy.

Matapos ang mga pambuwelong tanong... tinumbok na ni Ai Ai ang gustong marinig ng lahat. Diretsahan niyang tinanong si Mommy Divine kung totoong siya ang nagpatigil kay Gerald sa panliligaw kay Sarah.

"Tsismis naman yan... No. Actually kami nga ni Daddy ang nagbigay ng permiso na ligawan siya sa bahay. Kinausap  namin siya talaga ng formal, na sabi ko, sa bahay lang pwedeng ligawan ang anak ko, hindi sa labas, hindi sa text. And then sabi ko kung mapagpapasensyahan mo yung patakaran namin, ganito kami. And nirerespeto namin, respetuhin mo rin kami. Kasi babae yung anak ko. But ah... ewan ko kung dapat sabihin..."

Sa puntong ito kitang kita sa screen ang pagpigil ni Sarah sa Mommy niya... pero sa pagpapatuloy nito, sabi ni Mommy Divine, "pero hindi yata ano, di ba? Pero kung hindi mapagtyagaan yung ganun, at mapayagan..." Para mapigil si Mommy sa tuluyang pagre-reveal, niyakap na ni Sarah si Mommy sabay bulong dito. At paglilinaw ng Popstar Princess, "sa totoo po talaga, hindi po Mommy ko ang nagpatigil kay Gerald na manligaw talaga, so wala..." Sa sinabing ito ni Sarah, nalinaw na hindi pinatigil ni Mommy. Ang naiwang tanong, kung walang nagpatigil... sumuko na ba si Gerald?

Kung akala ng lahat ay natapos na dun ang medyo "painful" para sa marami na revelations, sa sumunod na segment - kung saan kumanta si Sarah with her parents, hindi na ito nakapagpigil na maging emosyonal. Nagsimula sa messages ng mga magulang niya...

"Sarah ang message ko sayo, sana makatapos ka pa ng pag-aaral mo, good health, God bless nak. I love you, mahal na mahal ka namin. Ako bilang ama mo, bilang kaibigan, bilang tagahanga mo, hindi magsasawang sumuporta sayo. Mahal na mahal ka namin. Love you," sabi ni Daddy Delfin.

"Ako naman, natatandaan mo ang palaging, yung pinag-usapan natin sa CR, na Mommy sorry sabi mo sa akin, ang sabi ko Nak kahit anong mangyari, magtampo man kayo, magalit minsan sa akin, pero ang... magiging firm ako sa stand ko. Kung anong tama para sa inyo, lagi kong ilalaban yun, para maprotektahan ko ang pamilya. At mabigyan kayo ng magandang kinabukasan, maipagmalaki kayo ng kahit sino kung saan kayo mapunta. Sino mang maswerte para sayo, maging maswerte rin sayo dahil pinag-ingatan ka namin. Di ba? So lagi mo anak tatandaan yun, kahit anong mangyari, mga kapatid mo, nandyan lagi nagmamalasakit lagi sayo..." ang sabi naman ni Mommy Divine.

Sagot ni Sarah, "Sobrang pasasalamat ko sa Diyos dahil buo tayo Mommy, at nandyan po kayo para po gabayan ako. Ibangon ako pag nagkakamali ako, minamahal pa rin ako kahit nagkakamali ako. At patawad po dahil hindi po ako perpektong anak, pero gagawin ko po ang makakaya ko para patuloy ko kayong mahalin... (starts to get emotional) at sundin sa mga, sa mga aral po ninyo na binibigay sa akin dahil alam ko po na kayo ang nakakaalam ng makakabuti para sa akin. Mahal na mahal ko po kayo, at maraming maraming salamat po sa lahat ng suporta't pagmamahal."

"Darating din yun 'nak, wag ka mag-alala ibibigay din ni Lord yun," ang biglang sabi ni Mommy Divine giving a clue sa pinagdadaanan ni Sarah.

"Oo Ma! Hindi naman ako nagmamadali Ma eh, muntik lang!" tinawanan saglit ni Sarah ang hirit niyang ito pero sa pagyakap niya sa ina ay tuluyan na siyang napaiyak, sabay bawi na lang na "Ma kakanta tayo!"

Habang kinakanta nilang mag-ama ang "You've Got a Friend" may part na sa solo ng Daddy niya, matagal na hindi humarap sa camera si Sarah dahil naiyak na siya. Kahit pa natawa na siya nung kumanta na pati si Mommy Divine, ako personally damang dama ko ang pain na dinadala ni Sarah that time. Mula dito, ano pa kaya ang susunod na chapter sa buhay ni Sarah? Ano kaya ang isa pang bersyon ng kwento - mula kay Gerald? Lahat tayo naka-abang dyan, at syempre umaasang maging masaya na sana si Sarah G.